Wosia kamili wa Papa Francis wafichuliwa: Fahamu jinsi jlivyochagua safari yake ya mwisho

Vatican imeweka wazi rasmi wosia wa Papa Francis, waraka wa kipekee ulioandikwa kwa sauti ya imani na utulivu wa mtu aliyejiandaa kwa safari ya mwisho.

Wosia huo ambao ulitiwa saini mnamo Juni 29,2022, haukujikita katika urithi wa mali au mamlaka, bali katika maombi ya kuzikwa kwa namna ya heshima, ibada, na unyenyekevu.

Tofauti na mapapa waliomtangulia waliopumzishwa katika makaburi yenye haiba ndani ya Basilika ya Mtakatifu Petro, Papa Francis alichagua kupumzika ardhini, ndani ya Basilika ya Santa Maria Maggiore—kanisa alilolitembelea mara nyingi kwa maombi binafsi kabla na baada ya kila safari ya kitume. Ni chaguo lililojaa maana ya kiroho na ishara ya moyo wake wa kiaskofu.

“Kwa jina la Utatu Mtakatifu. Amina. Ninapohisi jua la maisha yangu ya duniani linaelekea machweo, na kwa tumaini lenye uzima katika Maisha ya Milele, nataka kueleza wosia wangu kuhusu mahali nitakapozikwa.”

“Nimekabidhi maisha yangu, huduma yangu ya kipadre na ya kiaskofu kwa Bikira Maria, Mama wa Bwana wetu. Kwa hivyo, ninaomba mwili wangu upumzike, ukisubiri siku ya ufufuo, katika Basilika ya Kipapa ya Santa Maria Maggiore.”

Papa alisisitiza kwamba kaburi lake liwe chini ya ardhi, la kawaida, lisilo na mapambo, na maandishi pekee yawe jina lake la Kipapa kwa Kilatini: Franciscus. Hakuomba sanamu wala kumbukumbu za vyeo—hii ikiwa ni ishara ya wazi ya falsafa yake ya maisha ya kawaida, hata akiwa kiongozi wa Kanisa la watu zaidi ya bilioni 1.4.

Pia alielekeza kaburi lake liwekwe kati ya Kanisa la Pauline (lenye picha ya Salus Populi Romani) na Kanisa la Sforza, maeneo yenye uzito wa kiroho kwake binafsi. Pia aliratibu mapema mfadhili wa kugharamia mazishi kupitia Kardinali Rolandas Makrickas, kuhakikisha gharama hazitakuwa mzigo kwa Kanisa.

Katika hitimisho la wosia huo wa kihistoria, alieleza: Mateso ya mwisho wa maisha yangu nimeyakabidhi kwa Bwana, kwa ajili ya amani duniani na undugu miongoni mwa watu. Bwana na awape thawabu wanaonipenda na wanaoendelea kuniombea.”

Safari ya Mwisho ya Kiongozi Mpole

Papa Francis alifariki dunia mnamo Aprili 21, 2025, kufuatia kiharusi kilichosababisha koma na hatimaye kushindwa kwa moyo kufanya kazi. Alionekana hadharani kwa mara ya mwisho Aprili 20 wakati wa Pasaka, akiwa dhaifu lakini mwenye tabasamu mbele ya maelfu ya waumini katika Uwanja wa Mtakatifu Petro.

Kwa sasa, mwili wake umehifadhiwa katika makazi ya Domus Santa Marta, na unatarajiwa kuhamishiwa Basilika ya Mtakatifu Petro kwa ibada za heshima za mwisho kabla ya kuzikwa rasmi. Hadi sasa, tarehe ya mazishi haijatangazwa, lakini mchakato wa kumchagua Papa mpya tayari unaendelea katika kipindi cha sede vacante—wakati ambapo kiti cha Mtakatifu Petro kipo wazi.

Papa Francis, ambaye jina lake halisi ni Jorge Mario Bergoglio, aliongoza Kanisa tangu 2013, akiwa Papa wa kwanza kutoka Amerika Kusini na wa kwanza kutumia jina Francis—kwa heshima ya Mtakatifu Francis wa Assisi, anayejulikana kwa maisha ya umaskini, unyenyekevu na upendo kwa viumbe wote.