RIP! Mwanahabari mashuhuri wa Kenya Nick Mudimba afariki dunia ghafla

Tasnia ya habari nchini Kenya imepata pigo kubwa kufuatia kifo cha mwanahabari mashuhuri, Nick Mudimba, aliyefariki dunia ghafla Jumapili, Machi 23, 2025.

Mudimba, ambaye alikuwa mwandishi wa habari wa muda mrefu, alianguka na kupoteza maisha akiwa nyumbani kwake katika eneo la Syokimau, Kaunti ya Machakos.

Kwa mujibu wa familia yake, Mudimba alikuwa akiugua kwa muda na alikuwa akipokea matibabu.

Mnamo siku ya tukio, alitazama mechi ya Harambee Stars dhidi ya Gabon kabla ya kuanguka ghafla.

Inadaiwa kuwa alikunywa dawa alizoandikiwa, kisha akapoteza fahamu na kuanza kupata mshtuko.

Juhudi za kumuokoa hazikufua dafu, na mwili wake ulipelekwa katika chumba cha kuhifadhi maiti cha Syokimau huku uchunguzi wa daktari ukisubiriwa kubaini sababu halisi ya kifo chake.

Nick Mudimba alikuwa jina kubwa katika sekta ya habari za michezo.

Alianza safari yake ya uanahabari katika KTN kabla ya kujiunga na Switch TV, na hatimaye akawa mwandishi mkuu katika CGTN Africa.

Kazi yake ilitambuliwa kwa weledi na bidii aliyoweka katika taaluma yake, jambo lililomfanya apendwe na wengi ndani na nje ya vyombo vya habari.

Wenzake wameelezea mshtuko mkubwa kufuatia kifo chake.

Mwandishi wa habari Ferdinand Omondi alimtaja Mudimba kama mtu mkarimu na mwenye roho safi.

"Alikuwa mmoja wa watu wenye utu wa kipekee na mcheshi," alisema.

Naye mtangazaji wa michezo Hassan Juma alimkumbuka kwa kusema, "Nick alikuwa mchapakazi, mtu wa watu, na rafiki wa kweli. Tutamkumbuka daima."

Habari za kifo chake zimeibua majonzi si tu kwa familia na marafiki, bali pia kwa wanahabari na mashabiki wa kazi yake.

Mashirima Kapombe wa Citizen TV aliandika kwenye mitandao ya kijamii, "Pumzika kwa amani Nick Mudimba. Mwanga wa milele umkuangazie."

Familia yake sasa inasubiri ripoti ya uchunguzi wa mwili ili kufahamu kilichosababisha kifo chake. Wakati huo huo, waandishi wa habari na mashabiki wake wanaendelea kumkumbuka kwa mchango wake mkubwa katika tasnia ya habari.

Nick Mudimba ameondoka, lakini alama yake katika uanahabari itaendelea kudumu milele.