Siku ya kusherehekea kina baba duniani, mwanamitindo na mfanyibiashara mkubwa, Zari Hassan alimzimia deta baba wa watoto wake wawili, Diamond Platnumz na badala yake akachagua kumsherehekea mume wake wa hivi karibuni, Shakib Lutaaya.
Zari alimsherehekea Shakib kama baba bora kwa mwanawe mmoja na mke wake wa kwanza, na kufichua kwamba anatumai hivi karibuni atamfanya kuwa baba wa mtoto wa pili.
“Heri njema ya siku ya kina baba, mpenzi wangu baba wa mtoto mmoja. Natumai nitakufanya kuwa baba wa mtoto wa pili inshaallah,” Zari aliandika kwenye picha ya pamoja na mpenzi wake.
Zari alifanya hivi kwa makusudi, na kukwepa kumtambua baba wa watoto wake wawili wadogo, Diamond Platnumz licha ya kuwa wamekuwa na wakati mzuri wakishirikiana katika malezi yao.
Mwanamitindo huyo alifunga ndoa na Shakib mwezi Aprili na mwezi mmoja baadae wakapapurana vikali na Diamond mitandaoni kwa kile alisema kuwa msanii huyo alikuwa anasema uongo katika kipindi cha Netflix, Young Famous & African.
Kwa mujibu wa Zari, Diamond alisema uongo kuwa Zari alimlilia kuzaa na yeye mtoto wa tatu, huku akisema kuwa si lazima msanii huyo alitumie jina lake katika kujinyakulia vidosho.
Zari pia alisema kuwa alikuwa bilionea wa kujitengeneza hata kabla ya kukutana na Diamond, na wala si msanii huyo aliyempa umaarufu na utajiri wake.
Hata hivyo, Zari alisema kuwa kitu pekee anachokitegemea kutoka kwa Diamond ni karo ya shule kwa ajili ya wanawe, wajibu ambao alisema msanii huyo amekuwa akitekeleza bila kufeli.
