Baada ya kimya cha Zaidi ya mwaka mmoja, hatimaye msanii Ibraah amewakata kiu mashabiki wake kwa kuachia kibao kimoja kwa jina Hapa.
Ibraah kupitia insta story yake aliandika ujumbe mrefu wenye ukakasi akidokeza kwamba maisha yake ya Sanaa kwa sasa yako katika wakati mgumu Zaidi.
Msanii huyo ambaye hivi majuzi bosi wake – Harmonize – alisema kwamba kimya chake cha muda mrefu kimechangiwa na tofauti za kimaokoto na kampuni ya kusambaza kazi za wasanii, Zikki Media, alidokeza kwamba alibainisha haya ila hakuweza kuzungumzia kwa kina Zaidi kuhusu ugumu huo wa Sanaa yake.
Ibraah aliwataka mashabiki kumpa kumbato la kishua kwa kustream wimbo huo mmoja kwenye majukwaa yote ya kidijitali, akisema kuwa ni wajibu wake kuwapa burudani licha ya kwamba hajakuwa na uwezo wa kufanya hivyo kwa miezi kadhaa sasa.
“Maisha ya Sanaa yangu kwa sasa hivi ni magumu sana ila nawapenda sana mashabiki wangu na najua kwamba mnanipenda sana ndio maana siku zote nitahakikisha ninatumia wajibu wangu kwenu nikisimama kama kijana wenu mlionipa dhamani ya kuwaburudisha kwa kuwapa muziki mzuri,” Ibraah alisema.
Ibraah alibainisha kwamba wimbo huo ndio wake wa kwanza kutoa mwaka huu na kuwaomba waendelee kumpa sapoti mashabiki.
Bosi wake Harmonize pia aliupaisha wimbo huo kwenye Instagram yake yenye wafuasi takribani milioni 10 na kusema kwamba amerudi kwa kishindo.
Hata hivyo, kilichowashangaza watu ni Ibraah kupakia link ya kuwaelekeza mashabiki kwenye muziki wake katika jukwaa la Zikki – jukwaa ambalo Harmonize alilituhumu kwa kukatalia maokoto ya muziki wa Ibraah kwa Zaidi ya miezi 8.
