Rapa wa Marekani Big Pokey amefariki dunia baada ya kuzimia wakati wa onyesho huko Texas.
Msanii huyo, ambaye jina lake halisi ni Milton Powell, alikuwa akitumbuiza katika hafla yenye mada ya ‘Juneteenth’ kwenye baa moja siku ya Jumamosi alipoanguka chali jukwaani.
Mashahidi walikimbia kumsaidia kijana huyo mwenye umri wa miaka 45 kabla ya kupelekwa katika hospitali iliyo karibu.
Alifariki dunia siku ya Jumapili.
"Alipendwa sana na familia yake, marafiki, na mashabiki wake waaminifu," msemaji wake alisema katika taarifa.
"Big Pokey milele atakuwa 'The Hardest Pit In The Litter!'", taarifa hiyo iliongeza, ikirejelea albamu ya kwanza ya rapa huyo.
Video iliyosambaa kwenye mitandao ya kijamii ilionyesha Powell akianguka chali ghafla akiwa na kipaza sauti mkononi alipokuwa akitumbuiza kwenye Baa ya Pour09 huko Beaumont.
Wahudumu wa afya waliitwa muda mfupi kabla ya saa sita usiku saa za huko, msemaji wa Polisi wa Beaumont aliambia gazeti la Houston Chronicle.
Sababu ya kifo haijatolewa.
Powell alijulikana zaidi kama mwanachama mwanzilishi wa Screwed Up Click, mkusanyiko wa hip-hop wenye ushawishi wa wasanii wa Houston.
Powell alishika nafasi ya kwanza kwenye Billboard Hot 100 alipotokea kwenye wimbo wa Paul Wall Sittin Sidewayz mwaka wa 2005.
Na mwaka jana, alishiriki kwenye wimbo wa Southside Royalty Freestyle wa Megan Thee Stallion.
Wasanii mbalimbali wakiwemo Juice J, Slim Thug na Lil Flip wametoa rambi rambi zao.
