Antony Ng’ang’a, baba wa watoto wawili, alifunguka jinsi alivyoishi katika ndoa ya dhuluma iliyofikia kilele kwa mkewe kumtelekeza na mtoto wa miezi mitatu.
Akizungumza kwa uwazi kwenye kipindi cha Shajara with Lulu cha Citizen TV, Antony alikumbuka kukutana na mke wake wa wakati huo mwaka wa 2016 na wakafunga ndoa mara moja. Kulingana na yeye, ndoa yao ilikuwa na shida tangu mwanzo.
"Ningeenda kazini saa kumi na moja asubuhi na kurudi karibu na usiku wa manane. Siku moja jirani yangu alinipigia simu na kunifahamisha kuwa kuna mwanaume nyumbani kwetu na aliondoka mara baada ya kuingia ndani ya nyumba hiyo. Hii ilikuwa baada ya majirani kuniambia walimwona mke wangu akiwa na wanaume wengine,” alikumbuka.
"Alianza kunywa pombe na nilikuwa nikikutana naye akishikana mikono na wanaume wengine barabarani na kila nilipokuwa nikiuliza, walinishambulia,” aliongeza.
Antony aliacha kulala kitandani na mkewe na kuhamia chumbani kwa watoto wao kisha siku moja mke akamjulisha kuwa amemaliza ndoa yao na kuondoka.
"Alichukua watoto pamoja naye lakini aliwarudisha asubuhi akiwemo aliyekuwa na miezi mitatu, nilimsihi akae hasa kwa mtoto wa mwisho ambaye niliamini anamhitaji mama yake, alikataa," alisema.
Kazi ya mauzauza na kulea watoto wake wawili ikawa changamoto kwake na kumfanya apoteze nafasi nyingi za kazi kwa sababu ya watoto.
Anakumbuka jinsi ambavyo hawakuweza kumudu chakula au kodi ya nyumba na wakati mwingine waliishia kukosa makazi.
“Nilikuwa nawaacha watoto wangu bila mtu na kwenda kutafuta kazi na jambo hili lilikuwa linanipa wasiwasi sana, wakati mwingine nilikuwa narudi nyumbani bila kitu na kunilazimisha kuwapa maji kwa sababu sikuwa na chakula,” alisema.
