Naibu Rais amewataka mawaziri kujiuzulu ikiwa hawajaridhishwa na agizo la Rais William Ruto la kusitisha nyongeza ya mishahara kwa maafisa wakuu wa serikali.
Tume ya Mishahara na Marupurupu (SRC) imependekeza kuongeza mishahara kwa maafisa wakuu serikalini.
Hata hivyo, pendekezo hilo lilikataliwa na Rais, akiiagiza SRC kuongeza walimu, maafisa wa polisi, maafisa wa KDF na watumishi wengine wa umma kwa asilimia 7-10 kuanzia Julai 1.
Akizungumza huko Elgeyo Marakwet, Naibu Rais aliunga mkono agizo la Ruto akisema hakuna haja ya kuwaongezea mishahara wakati huu.
"Kwa sasa maafisa wakuu wa serikali wanaweza kusubiri hadi uchumi utengemaze. Tuwaongeze walimu na polisi wetu kwanza. Iwapo kuna Waziri ambaye hajaridhishwa na hatua ya Ruto kusitisha nyongeza ya mishahara, wanaweza kujiuzulu na sisi kuleta mtu mwingine," alisema.
Aliongeza kuwa hata fedha zikipatikana hawatazichukua na 'watarudi kwa mtumaji' wakipewa.
Gachagua alisema badala yake pesa hizo zinafaa kutumika kununua mbolea kwa wakulima na pia zitolewe kwa ajili ya ustawi wa wazee na wanawake.
SRC tangu wakati huo imetetea uamuzi wake, ikisema kuwa ukaguzi huo ulikuwa sehemu ya mzunguko wa awali ambao ulikuwa umesimamishwa kwa sababu ya Covid-19.
Mwenyekiti wa tume hiyo Lyn Mengich alisema Covid-19 imeathiri ukaguzi wa mishahara lakini sasa mambo yamerejea kuwa ya kawaida.
"SRC iliweka mzunguko wa ukaguzi wa miaka minne na sasa tuko katika mzunguko wa tatu wa ukaguzi. Kulikuwa na kusitishwa kwa muundo wa mishahara kutokana na Covid-19. Tume sasa imepitia Mishahara inavyohitajika," alisema.
