Mbunge wa Lang'ata Phelix Odiwuor almaarufu Jalang'o amesisitiza kuwa hakuna uhusiano mbaya kati yake na kiongozi wa Azimio Raila Odinga.
Katika mahojiano na Radio 47 Alhamisi, Jalang'o alisema anampenda Raila ambaye, mbali na kuwa kiongozi wa chama chake, anakuwa mshauri wake na babake wa kisiasa.
Jalang'o alibainisha kuwa hajawahi kumdhulumu kiongozi wa Upinzani na kwamba hana mpango wa kukiondoa chama cha Orange Democratic Movement.
"Sijawahi kosana na Baba hio ndio nataka kuwaambia. Nampenda Baba sana, ni political mentor, father figure na kila kitu. Sijawai mkosea na sijawai toka chama cha ODM na sitawahi toka," mbunge huyo alisema.
Jalang'o aliongeza kuwa anasalia kuwa mwanachama dhabiti wa chama cha Orange.
Alibainisha kuwa atatetea kiti chake kwa tiketi ya ODM iwapo uchaguzi mdogo utaitishwa leo.
"2027 ni mbali na sahii niko ndani ya chama hata tuambie twende by-election nitaenda nisukumane nao ndani ya chama na bado nitawashinda."
Jalang'o alifichua kwamba aliahidiwa kazi katika serikali ya kiongozi wa Azimio Raila Odinga kujiondoa katika kinyang'anyiro cha ubunge wa Lang'ata.
Hata hivyo, alisisitiza kuwakabili wawaniaji wengine kwenye kura hiyo na hatimaye kushinda uteuzi huo, na kuwashinda wagombea wengine watano.
"Kwanza tulitumwa twende consensus tusikizane tuwape mtu mmoja ikakataa. Kukaitwa mkutano mkubwa sana wa wazee ilikumpatia ule mwingine ticket nikaambiwa wameamua yule ndio atapewa na Baba (Raila) amesema ni huyo. Wewe umepangiwa Baba akiingia utapewa kazi ya communication kwa Presidential press kwa sababu uko na tajriba katika utangazaji. Baba anaingia.
"Nikasema hio siiamini sana nataka hii. Tupelekeni nominations wananchi waamue kwa sababu nilikuwa najua campaign nimepiga,"Alisema Jalang'o.
