Mtu mmoja alipigwa risasi wakati wa mkutano wa Kitaifa wa Wajumbe wa chama cha Ford Kenya katika ukumbi wa Bomas of Kenya siku ya Alhamisi.
OCPD wa Langata Benjamin Mwanthi alithibitisha mshukiwa alikamatwa. Mkutano wa wajumbe wa kitaifa wa chama hicho uliitishwa na mrengo wa chama hicho unaoongozwa na Seneta wa Bungoma Moses Wetang'ula.
Awali, mrengo wa Ford Kenya unaoongozwa na Mbunge wa Tongaren Eseli Simiyu ulitangaza kusimamisha mkutano wao kufuatia agizo la Mahakama ya kutatua mizozo ya vyama vya Kisiasa.
Mahakama hiyo ilisimamisha mikutano hiyo miwili iliyokuwa ifanyike sambamba, mmoja uliitishwa na mrengo unaoongozwa na Seneta wa Bungoma Moses Wetang'ula na mwingine mrengo wa Eseli. Akizungumza katika mkao na wanahabari kilichofanyika katika hoteli moja ya Nairobi siku ya Alhamisi, Eseli alisema agizo hilo lilitolewa kielektroniki mnamo Jumatano saa kumi jioni.
"Maandalizi ya mkutano wetu zilikuwa katika awamu ya mwisho. Tulikuwa tayari tumekodisha na hata kulipia ukumbi. Ingawa tumesikitishwa na uamuzi huo, tutatii maagizo kama tulivyofanya awali," alisema.
Ugomvi kati ya pande hizo mbili ulikuwa umetishia kusambaratisha mipango ya kisiasa ya kiongozi wa chama Wetangu'la ambaye alikuwa katika hatari ya kupinduliwa.
