Aliyekuwa nahodha wa muda mrefu wa Chelsea John Terry amemtaka aliyekuwa mchezaji mwenza katika timu hiyo ya Uingereza John Obi Mikel kurudi kutoka ustaafu na kujiunga na ligi ya Saudi Arabia ili kucheza.
Terry alimwambia Mikel haya baada ya kuona mchezo wake wikendi wachezaji hao wa zamani wa Cheslea walipokuwa wakicheza na wenzao wa Bayern Munich.
Katika mechi hiyo ya malejendari, Chelsea walishinda mabao 4-0 huku Terry akifunga bao la pili kunako dakika ya 26 ambayo ilisadifiana na jezi yake ya muda mrefu – 26.
Mikel Obi alikuwa mmoja wa wachezaji waliotia fora na nahodha wa zamani wa The Blues John Terry anaamini kuwa Mnigeria huyo bado anaweza kufanya maajabu kwa kiwango cha juu.
Kufuatia mechi hiyo, Terry alimtumia Mikel ujumbe kwenye mtandao wa Instagram akisema kuwa kiungo huyo wa kati wa Nigeria bado ana kipaji cha kuendelea kufanya vizuri uwanjani.
“Mikel John Obi, bado unaweza cheza vizuri kaitka viwango vya juu vya soka, hebu kaa tayari kwa ajili ya kwenda Saudi Arabia,” John Terry alimwambia.
Mikel Obi alikuwa na mafanikio makubwa akiwa Chelsea, akishinda Ligi ya Premia mara mbili, Kombe la FA mara nne, Kombe la Ligi mara mbili, na Ligi ya Mabingwa na Ligi ya Europa.
