• Kulingana na Wavinya, Rais amewapuuza watu waliokandamizwa aliapa kuwatetea wakati wa kampeni zake.
• Ndeti alitaja ubomoaji huo kama ukatili wa serikali na ukiukwaji mkubwa wa haki za watu walioathiriwa.
• Ndeti alizungumza Jumamosi alipowakaribisha makasisi kwa maombi katika afisi yake Machakos.
Image: X
Hotuba ya Gavana wa Machakos Wavinya Ndeti kuhusu ubomoaji wa ardhi ya Portland ya Afrika Mashariki Jumamosi iligubikwa na hisia, vilio na kuonyesha hasira.
Ndeti alisema amefanya mazungumzo na Rais William Ruto kuhusu suala hilo na akapinga ubomoaji huo akitaja kuwa usio wa kibinadamu na usio wa haki kwa wakazi walioathiriwa.
Gavana huyo alimshutumu Rais kwa usaliti akisema alifanya naye mazungumzo mapema siku hiyo na akaahidi kusitisha ubomoaji.
Kulingana na Wavinya, Rais amewapuuza watu waliokandamizwa aliapa kuwatetea wakati wa kampeni zake.
Ndeti alijawa na hisia nyingi hata alitokwa na machozi alipokuwa akihutubia hadhira, akisikitika kuwa Ruto ameiacha jamii ya Wakamba katika saa zao za shida.
"Kama ni kwako mweshimiwa Ruto ungekubali hiyo ifanyike. Hatuwezi kuruhusu hilo. Hatuwezi kukuruhusu kuangusha makanisa," Wavinya alisema huku akilia.
"Nataka nimwambie Mtukufu kuwa ulikuwa unaongelea chini juu, ulizungumza kuhusu kuwajali watu walioko huku chini. Kinachofanyika ni kwamba hao hao ndo unawaumiza. Kwanini unafanya hivyo?"
Hotuba ya gavana huyo ya kihisia-moyo ilikuja baada ya tingatinga kuteremka katika nyumba nyingi Ijumaa katika mpango wa makazi ya ‘Aimi ma Lukenya’ katika eneo bunge la Mavoko na kuzibomoa huku wamiliki wakiwa wamekaa.
Ndeti alitaja ubomoaji huo kama ukatili wa serikali na ukiukwaji mkubwa wa haki za watu walioathiriwa.
“Ilishangaza kwamba vyombo vya usalama vya Serikali viliendelea na ubomoaji wa nyumba bila kutoa notisi yoyote kwa watu walioathirika jinsi sheria inavyotaka. Inasikitisha haswa kwamba mchakato huo uliharakishwa isivyofaa ingawa kulikuwa na mijadala ya hali ya juu inayoendelea kati yangu na Rais William Ruto kuhusu suala hilo,” gavana huyo alisema.
Ndeti alizungumza Jumamosi alipowakaribisha makasisi kwa maombi katika afisi yake Machakos.
Alidai kusitishwa mara moja kwa ubomoaji na akahimiza mashirika ya Serikali yanayohusika kusitisha kuwafurusha maskwota hao kutoka kwa ardhi hiyo kwa misingi ya kibinadamu.
Mnamo Oktoba 9, 2023, Mahakama ya Mazingira na Ardhi huko Machakos ilibatilisha kesi iliyokuwa imewasilishwa na ‘Aimi ma Lukenya’, ambao wamekuwa wakidai ardhi hiyo kuu yenye ukubwa wa ekari 4,298.
Lady Jaji A Nyukuri katika uamuzi wake alibainisha kuwa Aimi Ma Likenya alikosa kuwasilisha hati zao kwa washtakiwa kama ilivyoagizwa na mahakama.
Ndeti aliapa kupinga uamuzi wa Mahakama Kuu. Alisema Serikali ya Kaunti haikuhusika katika kesi hiyo lakini ni mshikadau mkuu katika safu ya umiliki.
“Nimewaagiza mawakili wetu kupitia afisi ya Mwanasheria wa Kaunti kuagiza maagizo ya kupinga kesi hiyo kubatilishwa kupitia rufaa. Pia nimeagiza afisi ya Mwanasheria wa Kaunti kuhakikisha kuwa Serikali ya Kaunti ya Machakos imeratibiwa kama mhusika katika kesi hiyo,” Ndeti alisema.