Mahakama kuu yaruhusu KDF kutumiwa kukabiliana na waandamanaji

Mahakama Kuu imekataa kusitisha kutumwa kwa wanajeshi wa Jeshi la Ulinzi la Kenya (KDF) kusaidia polisi kuzima maandamano ya kupinga bajeti.

Badala yake, mahakama iliamuru kwamba serikali ieleze muda na upeo wa kutumwa kijeshi ndani ya siku mbili.

"Kuendelea kwa usaidizi wa kijeshi ni muhimu kwa kuzingatia hitaji la kuhifadhi utulivu na kulinda miundombinu ya kijeshi," aliamua Jaji Lawrence Mugambi katika kesi hiyo iliyosikilizwa majira ya jioni ya Alhamisi kupitia zoom.

Uamuzi huu ulikuja kujibu ombi lililowasilishwa na Chama cha Wanasheria wa Kenya (LSK), ambacho kilidai kwamba kutumwa kwa jeshi hilo kulifaa kutangazwa kwenye gazeti la serikali saa 24 baada ya kuidhinishwa na Bunge.

Jaji huyo aliamuru serikali kutangaza kwa dharura masharti yote ya shughuli za jeshi ndani ya siku mbili, akitupilia mbali hoja ya walalamishi kwamba Wizara ya Ulinzi haikutumia ipasavyo Ibara ya 241 ya Katiba ili kulazimisha kuingilia kijeshi.

Rais wa LSK Faith Odhiambo aliteta kuwa kutumwa kwa KDF mjini ni kinyume cha sheria, akisisitiza kuwa utaratibu uliochukuliwa ili kuidhinisha ulikuwa wa urembo tu.

“Tunachokiona ni Bunge na Watendaji kutufanyia sarakasi ili kuficha. Hatujawahi kuona hali kama hii tangu mapinduzi ya 1982," alisema.

Serikali kupitia Ofisi ya Mwanasheria Mkuu wa Serikali, iliitaka mahakama kutupilia mbali maombi ya LSK, ikisema kuwa serikali ilifuata katiba na walalamishi hawakutoa ushahidi wa kuunga mkono hoja yao.

Wanajeshi walitumwa mnamo Juni 25, 2024, baada ya waandamanaji kuvamia Bunge na kuchoma sehemu yake wakipinga Mswada wa Fedha wa 2024, ambao wabunge walikuwa wamepitisha.

Waandamanaji kadhaa walipigwa risasi, na wengine wengi kujeruhiwa au kukamatwa.

Kujibu, Waziri wa Ulinzi Aden Duale alitangaza kutumwa kwa jeshi kwa amri ya Rais, na hivyo kuzua hasira kati ya Wakenya, LSK, mashirika ya kiraia, na Muungano wa Upinzani wa Azimio.