Covid-19; Kenya yaagiza chanjo za pfizer, Johnson & Johnson kutokana na uhaba wa AstraZeneca

Kenya itanunua mamilioni ya dozi za chanjo ya Pfizer na Johnson & Johnson za Covid-19, Wizara ya Afya imesema.

Serikali ilisema imekuwa ngumu kupata chanjo za AstraZeneca, licha ya Kenya kuagiza dozi milioni 24, baada ya India kupiga marufuku usafirishaji wa chanjo hizo.

Kenya ilipokea awamu ya kwanza ya dozi milioni 1.02 za chanjo ya AstraZeneca mwezi Februari kutoka India kupitia mpango wa Covax, na dozi 100,000 zaidi zilizotolewa na serikali ya India.

India ilipiga marufuku uuzaji wa nje ya nchi wa chanjo za AstraZeneca mwezi Machi 25, na kulazimisha watengenezaji - Taasisi ya Serum ya India - kukidhi mahitaji ya ndani ya nchi hiyo kwanza.

Hatua hii ilisababisha kucheleweshwa kwa usafirishaji wa dozi hadi milioni 90 wa chanjo hiyo kwa nchi zingine pamoja na dozi za Kenya milioni 2.5.

Wiki iliyopita, kampuni ya Serum ya India ilisema kwamba mapema kabisa wanaweza kuanza mauzo ya nje ni mwezi Juni.

Siku ya Jumatatu, mkuu wa kamati ya utoaji chanjo ya Covid-19 Willis Akhwale alithibitisha kuwa Kenya ilikuwa inafanya mazungumzo ya kununua chanjo ya Pfizer na Johnson & Johnson.

Nchi pia imerekebisha ratiba yake ya chanjo na sasa inakusudia kuchanja watu wazima wote milioni 25 ifikapo Juni 2022. Hiyo ni watu milioni 9 zaidi ya milioni 16 katika ratiba iliyopita.

Dkt. Akhwale alisema Kenya inachukua njia mbili kwa kununua kupitia jukwaa la Afrika CDC na kujadili moja kwa moja na watengenezaji.

"Chini ya CDC ya Afrika tuko katika hatua za juu sana na kwetu sisi, chanjo ambazo zinapatikana huko ni pamoja na Pfizer, na tunatarajia Johnson & Johnson baadaye mwaka huu kupatikana," alisema Jumatatu.

Dkt Akhwale alisema India pia inajitahidi kupata malighafi kutoka Amerika kutengeneza chanjo zaidi.

"Najua kwa AstraZeneca kwa sasa kuna changamoto lakini ni kweli tunaangalia Pfizer, tunamtazama pia na Johnson & Johnson na nyingine yoyote ambayo inaweza kupatikana kwa urahisi ikiwa inatimiza masharti yetu kwamba, moja, ina idhini ya WHO na pili, imesajiliwa nchini, ”alisema.

Alizungumza wakati wa mkutano wa vyombo vya habari ulioandaliwa na Chama cha Wahariri na Unesco.

Dk Akwale alisema Pfizer pia ni bora kwa sababu inaweza kutumika kutoa chanjo kwa watoto wenye umri wa miaka 16, ambao wanachukuliwa kuwa waenezaji wa ugonjwa huo.

Hivi sasa, chanjo ya AstraZeneca pekee ndiyo imepewa idhini ya matumizi ya dharura nchini Kenya.

“Bodi ya Dawa na Sumu kwa sasa inakagua maombi kutoka kwa chanjo ya Sinovac na ninaelewa Pfizer pia inaandaa karatasi zake. Walakini, zile ambazo tayari zimetangazwa na WHO ni Pfizer, Moderna, Johnson & Johnson na AstraZeneca, "alisema.