Raila vile vile alidai kuwa serikali ilifadhili makabiliano baina ya jamii mbili katika mtaa wa Kibra akisema kwamba mikutano ya kupanga mashambulizi hayo iliandaliwa katika boma la waziri mmoja wa zamani na mmoja ambaye bado anahudumu.
Kulingana na Raila vijana waliovamia shamba la familia ya Kenyatta na Spectre walisafirishwa kutoka maeneo ya Kayole na Nyeri kwa lengo la kuwaadhibu viongozi hao wawili ( Uhuru na Raila).
Alidai kuwa rais Ruto kupitia maagizo kwa idara ya polisi alikuwa kitekeleza mauaji ya wafuasi wa Azimio.
Kiongozi wa upinzani alipuuzilia mbali madai ya Inspekta Jenerali wa Police Japhet Koome kuwa maandamano yao yalikuwa kinyume cha sheria akisema kwamba idara ya polisi haina mamlaka kuharamisha maandamano yao.
“Koome alitumia sheria gani kupiga marufuku maandamano, Koome aliweka maaskari kuzuia Azimio kuingia mjini” Raila alisema.
Kinara huyo wa upinzami alidai kwamba walikuwa tayari wamejuwa mipango ya serikali kutumia baadhi ya maafisa wa polisi waliovalia nguo za raia katika mashambulizi.
Muungano wa Azimio vile vile ulikosoa jamii ya kimataifa kwa kusalia kimya huku unyama ukiendelea kutekelezwa dhidi ya wananchi wa Kenya.
Raila alisema hawasitisha maandamano yao hadi pale matakwa yao yatakapo shughulikiwa.
Maswala wanayotaka kutekelezwa ni; kupunguzwa kwa gharama ya maisha,kufunguliwa kwa sava za IEBC, kurejeshwa kwa makamishna wanne wa IEBC waliosimamishwa kazi na kushirikisha wadau wote katika harakati za kuunda upya tume ya IEBC.
