Wakili Kithure Kindiki sasa anadai kuwa machafuko yaliyoshuhudiwa katika Bomas of Kenya mnamo Agosti 15, yalikuwa jaribio la mapinduzi.
Katika mawasilisho yake mbele ya Mahakama ya upeo Alhamisi, Kindiki alisema machafuko hayo yalikuwa yakitaka kubatilisha jukumu la Katiba katika uchaguzi huo.
"Matukio hayo na shughuli hizo ni sawa na jaribio la kupindua Katiba ya nchi yetu, kupindua matakwa ya uhuru wa watu wa Kenya, kinyume na Kifungu cha kwanza cha Katiba," alisema.
Aliongeza, "Ni maoni yetu kwamba matukio hayo hayana maana yoyote ila ni jaribio la kuanzisha serikali kinyume na katiba... matukio ya siku hiyo kimsingi ni jaribio la mapinduzi lililoshindwa."
Kindiki alisema mnamo Agosti 15, mawakala wa Azimio na maafisa wengine wa serikali wanaoshirikiana na Raila Odinga walivamia jukwaa la kituo cha kitaifa cha kuhesabia kura kwa nia ya kuingilia mamlaka ya IEBC kutangaza matokeo.
Wakili huyo anayemwakilisha Rais Mteule William Ruto, alisikitika kwamba mamlaka ya Mahakama chini ya Kifungu cha 140 hairuhusu kuadhibu vitendo vya uhaini.
"Lakini matukio haya lazima yafahamishe muktadha ambao ombi kuu na chipukizi zake zitahukumiwa," aliongeza.
Alikariri maombi ya Ruto kwamba maombi hayo yafutiliwe mbali akisema yalikuwa njia ya waandaaji wa machafuko kufaidika kutokana na mambo yao wenyewe.
"Mahakama hii inapaswa kumzuia Baraba na umati wake kufaidika na uovu wao wenyewe... Tunaomba kwamba maombi hayo yaondolewe kwa gharama."
