• "Ibada na mazishi yatafanyika Februari 10 nyumbani kwa marehemu babake katika Kijiji cha Lifunga Kobiero katika Kaunti ya Ugenya Siaya," ilisema taarifa.
Image: Maktaba
Familia ya aliyekuwa meneja wa ICT katika Tume Huru ya Uchaguzi na Mipaka (IEBC) Chris Msando imetumbukia katika maombolezo tena.
Hii ni baada ya Cornel Peter Msando, kakake Chris, kufariki katika hospitali ya Nairobi huku mazishi yakitarajiwa kufanyika Februari 10.
Hati ya kifo iliyochapishwa katika magazeti ya kila siku ilisema kwamba Peter aliaga dunia mnamo Januari 28 katika Hospitali ya MP Shah baada ya kuugua kwa muda mfupi.
"Ni kwa masikitiko makubwa tunatangaza kifo cha Cornel Peter Msando, Januari 28, 2024 katika Hospitali ya M.P Shah," sehemu ya taarifa hiyo inasomeka.
Kulingana na maelezo, anaacha nyuma mjane na watoto watatu, na kuchangisha pesa za kulipia gharama za mazishi zinazotarajiwa kufanyika katika Kanisa la All Saints Cathedral jioni ya Jumanne, Februari 6.
“Kutakuwa na ibada ya kanisa katika Consolata Shrine Westlands Alhamisi Februari 8 saa 10 asubuhi.
Ibada na mazishi yatafanyika Februari 10 nyumbani kwa marehemu babake katika Kijiji cha Lifunga Kobiero katika Kaunti ya Ugenya Siaya," ilisema.
Haya yanajiri miezi mitano tu baada ya mamake Msando kuzikwa.
Mama Maria Msando alifariki Oktoba 13, 2023, miaka sita tangu mtoto wake auawe, bila kuona haki ikitendeka.
Mnamo 2022, Maria alifichua kuwa bado alikuwa na shida ya kulala kila alipokumbuka jinsi mwanawe aliuawa.
Alisikitika kwamba haki ilikuwa bado kutendeka kufuatia tukio hilo la kinyama.
"Ukweli kwamba haki haijawahi kutendeka kwa familia yangu kufungwa na kuendelea, inaongeza chumvi kwenye jeraha," alisema.
Msando, mwanamume ambaye alikuwa ametwikwa jukumu la kusimamia Mfumo wa Kusimamia Uchaguzi wa Kenya (KIEMS) kabla ya uchaguzi wa 2017 alipatikana amefariki Julai 31, siku chache kabla ya uchaguzi wa Agosti 8.
Wakati wa kifo chake, Msando alikuwa amekaa kazini kwa muda wa miezi miwili tu baada ya mtangulizi wake kusimamishwa kazi kwa kukataa kushirikiana na kampuni ya ukaguzi iliyopewa jukumu la kusafisha daftari la wapiga kura.
Alikuwa ametoweka mnamo Julai 28, 2017, na siku nne baadaye, mwili wake ukiwa nusu uchi ulipatikana, sambamba na ule wa mwanamke aliyejulikana kama Carol Ngumbu, katika msitu wa Maguga huko Kikuyu, ukiwa na alama za mateso.
Alikuwa na mikwaruzo mirefu na michubuko mgongoni, huku taarifa zikionyesha kuwa mkono wake mmoja haukuwepo.
Matokeo ya uchunguzi wa maiti yalifichua kwamba aliteswa na kunyongwa hadi kufa.