Si waaminifu-Sifuna asema baada ya wabunge wa ODM na Jubilee kukutana na Ruto

Seneta wa Kaunti ya Nairobi Edwin Sifuna amesema Wabunge tisa waliomtembelea Rais William Ruto Jumanne si waaminifu kuhusu ajenda zao.

Kupitia  akaunti yake rasmi ya Twitter, Sifuna alisema wabunge hao hawakulazimika kwenda Ikulu ili kuendeleza maeneo bunge yao.

"Kama mlipa kodi, hutakiwi kuomba maendeleo. Kama vile ambavyo Serikali haikuiti kwenye ikulu wakati wa kukutoza ushuru, vivyo hivyo huhitaji mkutano huko kupata maendeleo, ni haki yako Hawa wageni wa ikulu sio waaminifu lakini ulishajua hilo. ," aliandika.

Kwa mara ya kwanza Seneta alikuwa akijibu ziara ya Wabunge wa ODM Ikulu ambayo ilipokea kejeli kutoka kwa wenzao wa Azimio.

Mkurugenzi wa mawasiliano wa chama Philip Etale pia alisema kuwa mkutano wa wabunge haukuwashangaza wao na Muungano wa Azimio la Umoja One Kenya.

"Chama kimekuwa kikifuatilia kwa karibu shughuli zinazohusisha baadhi yao na leo ilikuwa kilele tu," alisema katika taarifa yake.

Etale alitaja mikutano ya Ikulu kama mbinu ya kugeuza mawazo ya taifa kutoka kwa gharama ya juu ya maisha, ada za shule zisizostahimilika kwa watoto wao na ufisadi.