Miili 14 zaidi imefukuliwa katika makaburi ya watu wanaoaminika kufariki kwa kufunga kutokana na mafundisho yanayofanana na ya kiibada ya kasisi wa Malindi, Paul Mackenzie katika eneo la Shakahola, Magarini.
Hii inafikisha 21 idadi ya miili ambayo imefukuliwa na kitengo cha mauaji, wapelelezi wa DCI na maafisa wengine wa usalama.
Miili mitano, inayoaminika kuwa ya watu wa familia moja ilipatikana katika kaburi moja.
Katika kaburi jingine, miili mitatu ilipatikana juu ya kila mmoja.
"Tulimpata, mwanamume, mwanamke na watoto watatu kwenye kaburi moja," mpelelezi alisema
Kati ya miili iliyofukuliwa, watoto walikuwa wengi ikilinganishwa na watu wazima.
Kufikia Ijumaa makaburi 58 yalikuwa yametambuliwa.
Timu ya maafisa wapatao 100 wakiongozwa na Mkurugenzi wa kitengo cha Mauaji pamoja na mwanapatholojia, maafisa kutoka DCI, Idara ya uchunguzi, na polisi wa kawaida wanaongoza operesheni hiyo.
Wananchi hawakuruhusiwa katika eneo la tukio na waandishi wa habari pia walipewa maelekezo ya jinsi ya kujiendesha katika eneo la tukio.
Baada ya takribani masaa mawili ya kuchimba, kulikuwa na dalili kwamba kulikuwa na miili na kwa uangalifu mkubwa mwili mmoja wa mtu mzima ulipatikana ukifuatiwa na miili miwili iliyokuwa imezikwa kwenye kaburi moja.
Eneo hilo lilitambuliwa Alhamisi.
Wanaharakati wa haki za binadamu kutoka Haki Africa na Malindi Social Justice Centre pia walishuhudia mchakato wa ufukuaji.
Mathias Shipeta wa Haki Africa alisema wamefurahishwa na hatua iliyofikiwa hadi sasa na vyombo vya usalama.
