• Baada ya uchunguzi wa kina, alinyanganywa ushindi wa nafasi ya tatu na kupewa kwa mwanariadha aliyemaliza nyuma yake.
Image: BBC News
Mwanariadha wa mbio za marathon ameondolewa kwenye mbio kwa kudaiwa kutumia gari.
Joasia Zakrzewski alimaliza mbio za GB Ultras za kutoka Manchester hadi Liverpool, Aprili 7, katika nafasi ya tatu. Hata hivyo mkimbiaji huyo mwenye umri wa miaka 47, kutoka Dumfries, Scotland, alipatikana kuwa alisafiri maili 2.5 kwa gari, umbali sawa na kilomita 4.
Aligunduliwa baada ya data ya kuchora ramani kugundua kuwa alisafiri maili moja kwa dakika moja na sekunde 40.
Mkurugenzi wa mbio za GB Ultras, Wayne Drinkwater, alisema matokeo hayo "yanakatisha tamaa sana".
"Suala hilo limechunguzwa na, baada ya kukagua data kutoka kwa mfumo wetu wa ufuatiliaji wa mbio, data ya GPX, taarifa zilizotolewa na timu yetu ya hafla, washindani wengine na kutoka kwa mshiriki mwenyewe, tunaweza kudhibitisha kuwa mkimbiaji sasa ameondolewa kwenye hafla hiyo kwa kutumia usafiri wa gari wakati wa sehemu ya njia.”
"Suala hili sasa liko kwa TRA (Chama cha Mbio za Njia) na, kwa upande wake, Riadha ya Uingereza (UKA) kama vyombo vya udhibiti."
Zakrezewski alimaliza wa 14 katika mbio za marathon za Michezo ya Jumuiya ya Madola za 2014 huko Scotland na ameweka rekodi nchini Uingereza zaidi ya maili 100 na 200.
Nafasi ya tatu katika mbio za GB Ultras sasa imetunukiwa Mel Sykes. Adrian Stott, rafiki wa mwanariadha huyo, aliiambia BBC kwamba "anasikitika sana" na alijisikia vibaya kabla na wakati wa mbio.
Alisema: "Mashindano hayakwenda kwa mpangilio. Alisema anajisikia mgonjwa na uchovu kwenye mbio na alitaka kuacha. Ameshirikiana kikamilifu na uchunguzi wa waandaaji wa mbio, akiwapa maelezo kamili ya nini kilitokea. Anasikitika kwa kweli kwa usumbufu wowote unaosababishwa."