Papa Francis asema starehe ya tendo la ndoa ni 'zawadi kutoka kwa Mungu'

Kiongozi wa kanisa katoliki Duniani Papa Francis amesema kwamba furaha ya tendo la ndoa ni "zawadi kutoka kwa Mungu" ambayo inapaswa "kuwa na nidhamu na uvumilivu."

Pia alionya dhidi ya ponografia, ambayo alisema inawafanya binadamu "kuridhika bila kuingia katika uhusiano" na inaweza kusababisha uraibu.

Papa alikuwa akizungumza mbele ya hadhara yake kuu mjini Vatican siku ya Jumatano.

Hotuba hiyo ambayo ni sehemu ya mfululizo wa mahubiri kuhusu tabia mbaya na wema, ililenga kile Papa alichokiita “pepo wa tamaa”.

Papa alisema kwamba tamaa "huharibu uhusiano kati ya watu" na kuongeza kuwa "habari za kila siku zinatosha kuandika ukweli huu".

"Je, ni mahusiano mangapi ambayo yalianza kwa njia bora na baadaye yamegeuka kuwa mahusiano yenye sumu?" Aliuliza.

Papa alitoa maoni hayo siku chache baada ya mkuu wake mpya wa mafundisho, Kadinali Victor Manuel Fernández, kulaumiwa kwa kitabu alichokiandika na kuchapishwa mwishoni mwa miaka ya 1990 kiitwacho Mystical Passion: Spirituality and Sensuality.

Kitabu hicho, ambacho chapa zake zimeisha, kilijadili kwa kina jinsia zote mbili na kutoa maelezo ya kina ya uzoefu wa kiume na wa kike wakati wa kilele.

Akizungumza na chapisho la mtandaoni la Kikatoliki la Crux, Kadinali Fernandez alisema aliandika kitabu hicho alipokuwa bado mdogo na "hakika asingekiandika" sasa.

Wachambuzi wa kihafidhina wamekiita kitabu hicho kuwa "kipotovu", huku mmoja akisema ilionyesha Kardinali Fernandez "hafai" kuwa gavana wa Dicastery for the Doctrine of the Faith.

Hii si mara ya kwanza kwa Papa Francis au Kardinali Fernandez kuwakasirisha wahafidhina wa jumuiya ya Kikatoliki.

Mnamo Desemba, Kardinali Fernandez alianzisha andiko, ambalo baadaye liliidhinishwa na Papa Francis, likieleza kwa kina miongozo inayowaruhusu makasisi kubariki mahusiano ya wapenzi wa jinsia moja ambayo bado yalionekana kuwa dhambi.

Ingawa Kadinali Fernandez alisisitiza kwamba msimamo huo haukuthibitisha hadhi ya wapenzi wa jinsia moja machoni mwa Kanisa Katoliki, kwa wahafidhina wengi uharibifu ulikuwa tayari umefanyika.

Kardinali Gerhard Müller, ambaye alikuwa mkuu wa mafundisho ya Kanisa chini ya Papa Benedict XVI, alishutumu vikali hatua hiyo ya Vatican.

Katika jibu refu lililowekwa mtandaoni, Kadinali Müller alisema kwamba kasisi anayebariki muungano wa watu wa jinsia moja atakuwa akifanya "kitendo cha kufuru na kufuru".

"Kulingana na kigezo cha aina hii ya baraka, mtu anaweza hata kubariki kliniki ya utoaji mimba au kikundi cha mafia," Kardinali Müller alisema.

Maaskofu kote ulimwenguni pia walitoa taarifa za kulaani uamuzi huo, wakiwemo wahafidhina wa Marekani, ambao kwa muda mrefu wamekuwa wakipinga mipango ya Papa ya kulifanyia mageuzi Kanisa Katoliki.

Mvutano ulifikia hali mbaya zaidi wakati Papa alipomfukuza mkosoaji wake mkubwa nchini Marekani Kardinali Raymond Burke kutoka kwa nyumba yake ya Vatican na kufutilia mbali mshahara wake.