Abdulkadir Mohamed Haji ameapishwa kuwa Seneta wa kaunti ya Garissa.
Anachukua nafasi ya baba yake, marehemu Yusuf Haji, aliyefariki Februari 13 katika Hospitali ya Aga Khan, Nairobi alikokuwa akipokea matibabu.
Tume Huru ya Uchaguzi na Mipaka (IEBC) ilitangaza Haji kama seneta wa Garissa mnamo Aprili 6 baada ya kukosa mpinzani.
Mwenyekiti wa IEBC Wafula Chebukati alitangaza kuwa "hakuna upinzani" na akatangaza Haji "amechaguliwa kihalali kama Seneta wa Kaunti ya Garissa."
Uchaguzi mdogo wa Garissa ulikuwa umepangwa kufanyika Mei 18.
Alitakiwa kugombea kiti cha useneta kwa tikiti ya Chama cha Jubilee lakini alikuwa mgombea wa pekee katika kinyang'anyiro hicho.
Haji ni mfanyabiashara mashuhuri na alijulikana sana kati ya wamiliki wa silaha wa kibinafsi ambao walichukua jukumu muhimu katika uokoaji wakati wa shambulio la Westgate Mall mwaka 2013.
Katika hotuba yake ya kwanza, Haji aliwashukuru maseneta kwa msaada waliotoa kwa familia yake baada ya kifo cha baba yake.
Akizuia machozi, alisema familia yake bado inapata ujumbe kutoka kwa marafiki wa baba yake wakiwaambia kile babake alimaanisha kwao.
“Niligundua asubuhi ya leo kwamba tunaanza mwezi mtukufu wa Ramadhan. Utakuwa mwezi wa kwanza mtakatifu maishani mwangu bila baba yangu, ”alisema.
Seneta wa Vihiga George Khaniri alisema kwamba kwa kuchaguliwa bila kupingwa ni dhihirisho tosha kwamba watu wa kaunti ya Garissa walikuwa na imani na Haji.
"Nilikuja Bunge chini ya hali kama hiyo miaka mingi iliyopita baada ya kumpoteza babangu ambaye alikuwa mbunge wa eneo bunge la Hamisi. Alikufa mikononi mwa baba yako ambaye wakati huo alikuwa Mkuu wa Mkoa. Alikuwa na babako kwenye hafla wakati alipoanguka na akamkimbiza hospitalini huko Kisumu, "Khaniri alisema.
Seneta huyo wa Vihiga aliongezea kwamba marehemu Haji aliongoza kampeni za kumchagua kuwa mbunge wa Hamisi.