Tanzia! Mwanasiasa afariki baada ya kuanguka kutoka orofa ya nne Roysambu

Mhamasishaji maarufu wa kisiasa katika Kaunti ya Bungoma, Joseph Kubende amefariki baada ya kuanguka kutoka orofa ya nne katika eneo la Roysambu, Nairobi.

Polisi na mashahidi wengine walisema Kubende, 42, alikuwa peke yake wakati alipoanguka siku ya Alhamisi jioni na alianguka kichwa chini na kupoteza fahamu.

Alikimbizwa katika Hospitali ya Jesse Kay kwenye Barabara ya Lumumba kabla ya kupewa rufaa ya kwenda Hospitali ya Radiant, katika mtaa wa Pangani ambako alifariki.

Alikuwa amekuja Nairobi kumtembelea binamu yake Justo Misika Wanyama wiki jana na alikuwa akielekea Marekani ambako anaishi na kufanya kazi, polisi walisema.

Mnamo Alhamisi, Machi 23, inasemekana Kubende alikuwa kwenye roshani ya jumba la GM peke yake kabla ya kuanguka kutoka orofa ya nne.

Haijabainika ni nini kilisababisha kuanguka kwake na ikiwa ilikuwa bahati mbaya au alisukumwa, mkuu wa polisi wa Nairobi Adamson Bungei alisema.

"Tunaelewa alikuwa peke yake wakati wa tukio na hatujui ni nini kilitokea hadi kusababisha kuanguka kwake. Wakazi walipata mwili wake chini na kumkimbiza hospitalini,” alisema Bungei.

Alisema polisi wanachunguza tukio hilo.

Wakenya walijitokeza kwenye mitandao ya kijamii kuomboleza kifo cha Kubende.

Mbunge wa Kimilili Didmus Barasa aliungana na Wakenya kumsifu Kubende, ambaye alimtaja kuwa rafiki mkubwa.

"Pumzika kwa Amani rafiki yangu mzuri Joseph Kubende. Nimethibitisha hivi punde kwamba kijana anayeng’aa amepumzika baada ya kuanguka kutoka orofa ya 4 ya ghorofa huko Roysambu," alisema mbunge huyo katika chapisho la mtandao wa kijamii.

Siku ya Jumapili, Machi 19, mhamasishaji huyo, ambaye pia anajulikana kwa sauti yake nzuri na kwa kutunga nyimbo za kisiasa, alisherehekea siku yake ya kuzaliwa kwa chapisho la kufurahisha kwenye mtandao wake wa kijamii.

Kubende alikuwa mahiri katia ulingo wa fasihi na alikuwa mwandishi, mwalimu wa maigizo na muziki, mzungumzaji na mhadhiri.

Pia aliwahi kuwa mhadhiri wa fasihi katika Taasisi ya Elimu ya Kigali.

Marehemu alikuwa mhamasishaji wa umati wa wanasiasa wa Bungoma bila pingamizi kwani angefanya umati wa watu kucheza na kuimba bila shida.

Alichangia pakubwa katika kumhamishia aliyekuwa Gavana wa Bungoma Wycliffe Wangamati kwenye kiti hicho mwaka wa 2017.

Juhudi zake zilizaa matunda huku Kubende akipewa kazi ya mkurugenzi wa itifaki wa kaunti.

Kubende angebadili utiifu wake na kuwa msaidizi wa aliyekuwa Waziri wa Ugatuzi Eugene Wamalwa.

Uchunguzi wa maiti unapangwa kufanyiwa kwa mwili wake kama sehemu ya uchunguzi wa tukio hilo.

Visa ambapo watu huanguka kutoka kwa majengo ya miinuko vimekuwa vikiongezeka jijini. Polisi wanahusisha baadhi yao kujiua na wengine kwa bahati mbaya.