Mwanamuziki mashuhuri wa nyimbo za kufoka Kennedy Ombima amekuwa akiugua kwa kipindi cha miezi minne ambayo imepita.
Haijathibitishwa wazi maradhi ambayo msanii huyo amekuwa akiugua kwani angali ameweka habari hizo kama siri.
Hata hivyo mke wa rapa huyo, Nana Owiti amefunguka kuhusu masaibu ambayo alipitia wakati hali ya afya ya mumewe ilikuwa imedhoofika.
Bi Owiti amefichua kwamba daktari aliyekuwa anahudumia King Kaka alipendekeza vipimo vya saratani kwani dalili ambazo mwanamuziki huyo alikuwa anaonyesha zilikaribia kufanana na za ugonjwa huo ambao unaogopwa sana duniani kutokana na madhara yake.
"Nakumbuka wakati daktari alipendekeza tufanye vipimo vya saratani. Kwa kweli alikuwa na sababu zake, namaanisha ulionyesha dalili zote na jambo hilo liliibua mawazo mengi ya shida kichwani mwangu" Bi Owiti alisema.
Ingawa jambo hilo lilimnyima usingizi bi Owiti, mumewe kwa upande wake hakuonyesha dalili zozote za mtu mwenye hofu
Owiti alikesha usiku kucha akiwaza ilhali King Kaka mwenyewe alilala usingizi wa pono kama mtu aliye buheri wa afya licha ya kuwa mwili wake ulikuwa umedhoofika.
"Sielewi ulivyoweza kulala kabisa usiku huo. Yaani unaenda kupimwa saratani mwilini asubuhi ifuatayo na unalala usiku kucha. Nataka kufunzwa" Bi Owiti alisema.
