Inaarifiwa kwamba marehemu mwanabiashara ngili nchini, Chris Kirubi hakuacha mali yoyote kwa mke wake na bibiye wa kando.
Kirubi alifariki mwezi Juni mwaka jana akiwa ametimu miaka themanini, huku tangu siku hiyo wengi wakizidi kukuna vichwa kuhusu ni vipi mali zake zenye dhamani ya shilingi bilioni ishirini zingegawanywa miongoni mwa familia yake.
Kulingana na barua ya urithi aliyoiandika mwaka wa 1996, mfanyibiashara huyo aliwakabidhi mtoto wake wa kiume [Robert Kirubi] na bintiye [Mary-Anne] asilimia themanini ya nyumba zake huku akimpa msichana wake wa pili shilingi milioni nne.
Marehemu Kirubi hakuwasahau ndugu na dada zake wanne huku kila mmoja akipata shilingi milioni mia tano, jambo ambalo wanawe wawili Robert na Mary-Anne walikubaliana nalo.
“Tutashukuru iwapo utanakili mwafaka huu katika suala lililozungumziwa hapo juu. Kwamba agizo litolewe kuwa Fiona Wambui Kirubi atapokea asilimia 9.95 ya sehemu ya mali ya Robert Kirubi na Mary- Anne ikiwa ni asilimia themanini ya mali yote,” ridhaa hiyo ilisema.
Hiyo inamaanisha kwamba Fiona Kirubi atapokea shilling milioni 1.6 kutoka kwa ndugu zake.
Swali kuu linasalia kuwa mwanabiashara huyu mwenye upeo wa juu alimiliki nini haswa?
Kirubi, ambaye alikuwa mshika dau katika sekta mbalimbali za uwekezaji, zikiwemo uanahabari, uzalishaji wa bidhaa na teknolojia, alifanikiwa kuwa na hisa zenye dhamani ya shilingi bilioni 12.7.
Uwekezaji wake katika kampuni zilizoorodheshwa katika soko la hisa la Nairobi [NSE] ni wa thamani ya shilingi bilioni 3.4.
Alikuwa pia amewekeza zaidi ya shilingi milioni 1.8 katika kampuni ya kuzalisha dawa [Bayers East Africa Limited] ambayo iliasisi huduma zake humu nchini mnamo mwaka wa 1968.
