Wakaazi wa kijiji cha Rangwe kaunti ya Homabay wamepigwa na butwaa baada ya mwanamume mwenye umri wa miaka 40 kujaribu kuwaua wanawe kabla ya kujitoa uhai.
Ronny Ochieng, aliwadunga kisu tumboni wanawe wawili ambao ni mapacha wa kiume wa miaka 3 kabla ya kuwapa sumu binti zake wawili wenye umri wa miaka 5 na 9.
Kulingana na ripoti iliyotolewa na maafisa wa upelelezi, baba huyo alikunywa sumu.
Majirani waliosikia vilio vya watoto hao na kuwakimbiza katika hospitalini ya Homabay ambapo wanapokea matibabu huku wakiwa katika hali mbaya.
Ripoti ya DCI ilisema baba huyo katili alitangazwa kufariki alipofika katika hospitali ya Homabay. Mama yao hakuwepo wakati wa tukio hilo.
Maafisa wa upelelezi waliongeza kuwa mzee huyo alikuwa ameagizwa kufika katika Afisi ya Idara ya Watoto mjini Rangwe Desemba 14 kwa madai ya kutekeleza dhulma za kinyumbani.
