Mbunge wa Gatundu Kusini Moses Kuria amemwagiza rais Kenyatta kutupilia mbali amri ya kutotoka nje kama njia ya kuonyesha mshikamano katika juhudi za kutafuta haki ya ndugu wawili waliofariki katika hali tatanishi Jumapili wiki iliyopita.
Benson Njiru (22) na Emmanuel Mutura (19) ambao walikuwa wanafunzi katika chuo kikuu cha Kabarak na chuo cha mafunzo ya kiteknolojia cha Don Bosco mtawalia wanadaiwa kukamatwa na polisi kutoka kituo cha polisi cha Manyatta mida ya usiku wa Agosti 1 kisha mili yao kupatikana katika mochari ya Embu siku mbili baadaye.
Familia ya wawili hao ilisema kuwa walifahamishwa kuwa maafisa kutoka Manyatta walikamata ndugu hao wawili katika soko ya Kianjokoma walikokuwa wanauza nyama ya nguruwe.
Alipokuwa anaonyesha ushirikiano wake kwenye mtandao wa Facebook leo asubuhi (Agosti 12), Kuria alidai kuwa ndugu hao waliuliwa na maafisa wa polisi walipokuwa wanafanya kazi.
Kulingana na Kuria, marehemu walikuwa wanajaribu kutafuta pato kubwa kutoka kwa biashara yao ya kuuza nyama ya nguruwe na ndio sababu wakachelewa kufunga.
"Rais Uhuru Kenyatta. Ili kuonyesha mshikamanano na #KianjokomaBrothers, tunakuagiza kuondoa kafyu mara moja. Walikuwa wanajaribu tu kutafuta faida kubwa kutoka kwa biashara yao ya kuuza nyama. Waliuliwa na wakatili wako wanaovaa nguo za bluu wakiwa kazini yao. Kazi yao ya kuuza nyama ya nguruwe ni muhimu pia. Maliza kafyu sasa!" Kuria alisema.
Hafla ya kuwakumbuka Njiru na Mutura imepangwa kufanyika jioni ya leo (Alhamisi) nyumbani kwao katika kijiji cha Kithangari kaunti ya Embu.
Wakenya ambao wana nia ya kuhudhuria hafla hiyo wametakiwa kubeba mchumaa kama ishara ya kuonyesha upendo kwa marehemu.
