• Mnamo Ijumaa, Mei 6, DP alitangaza kwamba jimbo lilikuwa limechukua jukumu la kupanga mazishi ya shujaa huyo chini ya Kamati ya Kitaifa ya Mazishi.
Image: Facebook
Marehemu Mukami Kimathi, mke wa aliyekuwa mpiganaji wa Mau Mau nchini Kenya Dedan Kimathi anatarajiwa kuzikwa Jumamosi Mei 13 nyumbani kwake kaunti ya Nyandarua.
Katika hafla hiyo ya mazishi ambayo inaandaliwa na serikali, kwa mara ya kwanza viongozi wakuu kutoka mirengo ya serikali na upinzani watakutana uso kwa uso.
Taarifa za ndani zinadai kwamba kiongozi wa upinzani Raila Odinga na rais William Ruto na naibu wake Rigathi Gachagua ni miongoni mwa watu wenye haiba ya juu katika siasa za Kenya ambao watahudhuria mazishi hayo.
Hii itakuwa mara ya kwanza kabisa kwa Odinga kukutana uso kwa uso na Ruto na naibu wake ambao wamekuwa wakizozana kwa maneno makali ya lawama takribani mwaka mmoja tangu kukamilika kwa uchaguzi uliokuwa na ushindani wa aina yake kati ya pande hizo mbili.
Kiongozi wa chama cha muungano cha Azimio La Umoja One Kenya Raila Odinga amekuwa na urafiki wa karibu na familia ya Kimathi. Raila aliutazama mwili wa Mukami katika Lee Funeral Home pamoja na mpigania uhuru mkongwe Gitu Kahengeri.
Alithibitisha kuwa atakuwa Njambini kwa mazishi. “Siwezi kukosa mazishi ya Shujaa Mama Mukami wa Kimathi. Tumekuwa karibu sana, na nitakuwa Njabini kwa sherehe yake ya mwisho duniani,” Raila alisema.
Mnamo Ijumaa, Mei 6, DP alitangaza kwamba jimbo lilikuwa limechukua jukumu la kupanga mazishi ya shujaa huyo chini ya Kamati ya Kitaifa ya Mazishi.
"Kwa mashauriano na familia, tumekubaliana kuwa ibada ya wafu itaandaliwa Jumamosi nyumbani kwake Njabini, kaunti ya Nyandarua. Rais Ruto ataongoza serikali wakati wa ibada," Gachagua alisema kwenye taarifa.