•Akizungumza wakati wa mkutano na zaidi ya wanawake 2,000 huko Rangwe, Kidero alisema ataboresha utoaji wa maji katika kaunti hiyo.
•Gavana huyo wa zamani wa Nairobi alisema atahakikisha barabara zinazoelekea kwenye vituo vya afya zinapitika.
Image: STAR
Mgombea ugavana wa Homa Bay Evans Kidero ameahidi kuboresha sekta ya afya kwa kupambana na vifo vya watoto wachanga na wajawazito.
Kidero alikuwa na wasiwasi kuhusu hali duni ya vituo vya afya huko Homa Bay licha ya sekta hiyo kupata mgao mwingi wa bajeti.
Homa Bay ni mojawapo ya kaunti zilizo na kiwango kikubwa cha vifo vya watoto wachanga na wajawazito.
Ni miongoni mwa kaunti zilizo na maambukizi makubwa ya Virusi vya Ukimwi na magonjwa ya malaria.
Hali mbaya ya vituo vya afya na usimamizi mbovu umesababisha vifo vya akina mama na watoto wachanga
Mnamo Jumatano, Kidero aliambia wakazi kuwa utawala wake utaboresha sekta ya afya na kushughulikia masuala hayo.
“Vituo vya afya Homa Bay vimeboreshwa na kupatiwa dawa kulingana na viwango vinavyohitajika. Hii itapunguza vifo vya watoto na akina mama wajawazito,” Kidero alisema.
Uboreshaji wa jumla wa afya ya watu utapatikana katika utawala wake. Akizungumza wakati wa mkutano na zaidi ya wanawake 2,000 huko Rangwe, Kidero alisema anaenda kuboresha utoaji wa maji katika kaunti hiyo.
Wanawake hao walitolewa kutoka maeneo bunge yote manane. Gavana huyo wa zamani wa Nairobi alisema atahakikisha barabara zinazoelekea kwenye vituo vya afya zinapitika.
Alikuwa na wasiwasi kwamba vituo vingi vya afya havina maji safi na salama.
Wakazi wanaoishi Homa Bay, Mbita, Sindo na Kendu Bay wanakabiliwa na uhaba wa maji safi licha ya kuwa katika ufuo wa Ziwa Victoria ambalo ni ziwa la maji baridi.
"Inasikitisha kwamba wanawake huko Homa Bay huamka saa kumi na moja asubuhi kusafiri umbali mrefu kutafuta maji safi. Homa Bay ina asilimia kubwa ya maji ya Ziwa Viktoria lakini haina bidhaa hivyo ni lazima kushughulikia suala hilo,” alisema.
Kidero alisema atawawezesha wakulima kwa kuwapatia mbegu za kilimo kwa bei ya ruzuku na nafuu ili kuwawezesha kulima mazao mbalimbali.
Hii itapelekea kuundwa kwa viwanda katika kaunti hiyo.
“Homa Bay ina risimali mbalimbali kama vile samaki, miwa na viazi vitamu miongoni mwa vingine. Tutaimarisha uzalishaji wa mazao na kuunda viwanda ambavyo vitatoa ajira kwa wananchi,” Kidero alisema.
Alisema utawala wake utawawezesha wanawake kuhakikisha wananufaika na utawala wake.
Waliohudhuria walikuwa wawakilishi wa wanawake wanaotarajia kuwa mwakilishi Moline Ngala (mgombea huru) na Mary Ojode (DAP-Kenya).
Kidero ambaye ni mgombeaji huru anachuana na Gladys Wanga wa ODM na Mark Rabudi wa UDA.